Fastelovendszigg en Monnem am Rhing

Anzeige
  Monheim am Rhein: Doll Eck |

Fastelovendsverzällche


Anjelehnt an „Dreizehnlinden“ vam F.W.Weber


Löstech es et, Fastelovend
us däm Werkeldaach, däm dröve,
uszekiele un met Fründe
an de Theke römzeströfe.

Manche dunn sech kostemiere,
unger Pürke sech versteche,
manche kenns de nit mieh widder
wann se sech dr Hals ens wäsche.

Jonge triff mr do un Weeter
die joot drop sin un jähn laache,
un dr Hein deht met dem Annche
Stöckcher van dr Sitzung mache.

Et es jedes Johr etselve,
wat se schwade, wat se senge,
ävver kenner, dä dobei es,
kann dobei jet Schlemmes fenge.

Wer kann dobei Schlemmes fenge,
en de Fastelovendswoche,
sin se doch et janze Johr lang
stressjeploch un huhjestoche.

Stressjeploch un huhjestoche
kammer sech nit amesiere,
dröm kann ech nur jedem rode,
kumm, dunn Fastelovend fiere.

Kumm, fier met us Fastelovend,
laach un drenk un seng die Leeder,
et sin meeschtendeels die ahle,
noh nem Stöndche kann se jeder.

Wat dotösche se verzälle
ohne vill ze üvverläje,
es ejal, et jeht bloß dodröm,
ahle Monnemer Käll ze fläje.

Ahle Monnemer Käll ze fläje,
Jong, do freue sech die Jecke,
un wie herrlich es et, wammer
Minsche durch de Zäng kann trecke.

Hür ens! schänge se van Frollück,
die sech doch jet schamme sölle,
die met Kähls, die schwer verhierot,
knöngele un fisternölle.

Kallen och van irem Meester,
van däm Knubbel met der Pläät,
wie se letz ens widder öhntlech
däm de Worret hant jesät.

Ävver dann höht mr se widder
Fastelovendskrom verzälle,
van däm Ware, dä se mache,
un dann dunn se Bier bestelle.

Bier bestelle dunn se döckes,
schlisslech well mr nit verdohschte,
un dann dunn se widder senge,
all die Weeter un die Pohschte.

Wann et spöder wöhd am Ovend,
dann dunn se op alle Fälle
van dä Fründe un dä Jröße
us dr ahle Zigg verzälle.

Minsche, die vör ville Johre
hant am Fasteleer jehange,
un en Hetz, Radau un Kürmel
an de Schänke hant jestange.

Wie dr Pitter Prinz jewohde,
wie se en de Vürkreechszigge
in beim Jaspe‘sch Hein bekallt hant
em Salong beim Kränzjeschnigge.

Van dä Fastelovendsjecke
en dr joode ahle Zigg,
Janek, Fipp un Adolf, Trina,
un „dr Karl“ un de Frau Nick.

Elferröt un Präsedente
kumme widder op‘t Tapet,
Hanni, Schmitze Jrön un Jummi,
Jethmann‘s Decke, Jäll un Breed.

Die sin en dä ahle Dare
för Helau noch opjetrodde
un hant met däm, wat se kunnte,
echte Fasteleer jebodde.

Un an Möhnefastelovend
leef en Monnem beieneen,
wat an Fastelovend Spass hatt,
un et Dörpche wor ze kleen.

Van dr Wupper un vam Kniebach,
van dr Ruhr un van dr Dhünn,
un et wohd jedanz beim Bruno,
un em Zollhus un beim Tünn.

All die schöne ahle Stöckcher
wähden widder neu verzallt,
- töschendurch, do dunn se senge,
un et wöhd fresch Bier bestallt. -

wie beim Zoch am Rusemondaach
met dä Plünne, die mr hatt,
mr sech selvs un dausend Minsche
immer widder Freud jemaht,

wie die „Pimocke“ all kome,
Jecke woren koom dobei,
jitz, wann de ens richtich nohlurs,
stonnt se en dr eeschte Reih.

Secher, wann de hück jehs fiere,
wann dr Fastelovend kütt,
dehs de eesch ens spekeliere,
wat et wal em Fernsehn jüt.

Ävver schlisslech säht sech jeder,
dä nit alt öm aach Uhr schlöf,
et wöhd nit drheem jeblevve,
wann dr Fastelovend röf.

Et es nit mieh su, wie fröher,
ävver öm dr ahle Maht
jüt et hück noch Fastelovend,
un sujar op Monnemer Aht.

Monnemer Aht an Fastelovend
dat es höppe, danze, laache,
un su, wie vür hundert Johre
füreneen et Ääpche maache..

De Doll Eck, wo fröher Minsche
sech dr Dollerei verschrevve,
es noch immer panisch-löstech,
knatschverröck sin se jeblevve.

Lur ens van dr Eech de Funke
en dä rud‘ un wisse Färve
met dä Blömcher en de Flinte...
jeck sin, Jong, dat kanns de erve.

Och die staatse Prinzenjarde,
Höppedötzjer, Maatplatzjecke,
fieren ire Fastelovend,
wollen all em Zoch mettrecke.

un die Stammdösch‘, die Vereine,
janz ejal, wat se sös drieve,
dunt sech all an Fastelovend
jähn dr Dollerei verschrieve,

wobei du Monnemer un Imis
nit va‘neen zortiere kanns,
Monnem hält et do met Kölle,
un säht: Jeck, loß Jeck elans.

Es dr Minsch och sös undöhnisch,
jitz kann jeder jeder ligge, -
wör et doch op Ähde iewich
wie zo Fastelovendszigge.
3
Diesen Mitgliedern gefällt das:
Information zu Weiterempfehlungen Einstellungen für Weiterempfehlungen
 auf anderen WebseitenSenden
4 Kommentare
30.806
Fritz van Rechtern aus Neukirchen-Vluyn | 29.01.2015 | 15:47  
26.329
Paul Scharrenbroich aus Monheim am Rhein | 29.01.2015 | 17:08  
30.806
Fritz van Rechtern aus Neukirchen-Vluyn | 29.01.2015 | 17:52  
26.329
Paul Scharrenbroich aus Monheim am Rhein | 29.01.2015 | 18:00  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.