Plattgedicht

Die Plüümeskappe

Pudelmütze mit Bömmel oder Plümmel, wahrscheinlich von plume=Feder
quitt=quittengelb

Chird Hardering

Die Plüümeskappe

Ick hatt ees Poos em Plüümeskappe,
Die Kappe, die wuar nee vam Pappe.
Ssu'n Kappe chuaw et chanz chewiss,
Tu miner Tied wahl nee noh' ees.
Die Kappe wuar an e-inem Stück
Ut kounterbountem Chaan gestrick,
Die Kappe wuar, we-il sse ssu' bount,
Bekaunt, ees wie em bounten Hound.

Doo, woo sse op dä Kop me-i ssuat,
Doo wuar die Kappe knallich ruat.
Doodrööwer, doo kuam dann en Striepe,
Ssu schwatt, chraad ees en Oowespiepe.
Dann kuam en Striepe, dän wuar witt
Un dann en cheele, chraad ees quitt.
Die Plüüm am E-in, die wuar chraass-chröön.
Wat wuar die Plüümeskappe schöön.

Die Plüümeskappen op’e Kop,
Doo feel ick ööweraal mit op.
Die Lüüd, die keeken ees en Aape
Noh' miner bountem Plüümeskappe.
Die Pööste mackten chruat Hallo!
Boll leepe me-i die Höin all noh.
We-il me-i dat alles chaarnee rääch,
Schmeet ick die Plüümeskappen wääch.

Ees ick doodrop, noh' em paar Stoun
Im nacke Kop dä He-imwääch foun',
Doo hing, tu minem chruate Schreck,
Min Plüümeskappe wirr am Reck.
Min Kappen, die ick fottgeschmeete,
We-il ick doo nicks miähr woul van weete,
Hing quietschverchnüüg an üahrem Pinn.
Wie kümp die Kappem bloos doohin?

Ees ick Daachs drop noh'r Schuale mutt,
Schmiet ick die Kappe noch ees fott.
Die Kappen wuar, chraad ees verück,
Iähr, ees ick ssälwes wirr, turück.
Mi' Mooder scheilt: „Dou Duselskop!
Paas beeter op din Kappen op,
Doo hängk sse wirr an üahrem Pinn!"
Wie kümp die Kappem bloos doohin?

Ssu' häw ick dann, ick will et weete,
Die Kappen tehn mool fottcheschmeete,
Un ümmer kuam dat bounte Dier
Tu minem Le-ids, va' ssälwes wier.
Am E-in ssoul ick et dann bechriepe:
En Kappe, mit ssu'm bounte Striepe,
Em Plümmeskappen die ssu' bount,
Die kaunt en jeeder, dän sse found.

Ees ick tu der Inssich chekome,
Häw ick die Plüümeskapp' chenohme
Un häw in Inkel sse gebatt.
Doo wuar die Plüümeskappe schwatt.
Vüar usem Huus dann, in der Chööte,
Häw ick sse noh' ees fottcheschmeete.
Van dän Daag heet et füar min Leewe
Ke-im Plüümeskappe miähr gecheewe.